Сезоната на празници е посебно време каде што можете да се поврзете со саканите и да уживате во вкусната храна. Меѓутоа, ако имате дијабетес, може да ви претставува малку предизвик да го контролирате нивото на шеќер во крвта додека сè уште се препуштате на вашите омилени празнични задоволства. Но, не грижете се, со внимателно планирање и подготовка, сепак можете да уживате во семејните веселби и празничната еуфорија без да го загрозите вашето здравје.
За почеток, важно е да си планирате однапред и да направите здрав избор секогаш кога е можно. Размислете да донесете јадење кое ќе го споделите со сите, а е погодно за дијабетичари или одлучете се да консумирате помали порции храна богата со јаглехидрати. Дополнително, обидете се да останете физички активни за време на празниците со одење на прошетка или организирајте некаква забавна физичка активност заедно со семејството и пријателите.
Не заборавајте редовно да го следите нивото на шеќер во крвта и да ги имате при рака сите потребни лекови или залихи. Не плашете се да разговарате со најблиските за вашите потреби и ограничувања, можеби тие ќе можат да ви дадат поддршка и разбирање.
Преземајќи ги сите овие чекори, можете да уживате во среќна и здрава празнична сезона без да ја жртвувате радоста и задоволството во вкусна храна и квалитетно поминато време со саканите.
1. Време на оброците
За време на празниците може да одите на семејните гозби или забави во временски период невообичаен за вашето секојдневие. Планирајте однапред како ќе се справите со правењето промени ако вашиот оброк не е усогласен со вашиот редовен распоред на оброци. Ако земате инсулински инјекции или таблети кои го намалуваат шеќерот во крвта, можеби ќе треба да јадете ужина во вашиот редовен оброк за да спречите појава на низок шеќер во крвта. Разговарајте со вашиот лекар за дијабетес пред празниците за да можете најдобро да испланирате како да се справите со промените на времето на оброците во текот на празничната сезона.
2. Бидете физички активни
Бидејќи храната е во центарот на празничното внимание, многу луѓе забораваат да се движат! Обидете се да продолжите со вашата редовна физичка активност. Ако сте опкружени со семејството и пријателите околу празничната сезона, тогаш започнете нова традиција која вклучува движење наоколу, како што се прошетки после вечерата, активни празнични настани, дури и појачајте ја музиката за да направите мала забава за танцување.
3. Планирајте ги вашите ужинки
За време на празниците, можеби ќе отидете на некоја забава каде што треба да почекате пред да се послужи храната. Прашајте го домаќинот кога ќе се послужи храна и дали ќе има некакво здраво мезе за јадење. Ако однапред знаете дека храната ќе бид пржена и многу калорична, тогаш размислете да понесете мала ужина со себе (како на пример, неколку парчиња сирење со малку масти), или понудете се да донесете здраво мезе за да го пробаат сите.
4. Бидете селективни
Многу традиционални јадења кои се служат за време на празниците имаат тенденција да бидат богати со јаглехидрати. На пример, традиционалната празнична трпеза вклучува различни видови на месо и сувомеснати производи, сарма, добро познатите празнични салати со многу маснотии, кифлички, сосови, торти и други десерти. Запомнете, не треба и не сте принудени да земате од сè што е понудено. Фокусирајте се на јадењата што се „поспецијални“ или што ги имате само во овој период од годината, но не претерувајте.
5. Јадете помали порции
Повеќето празници се исполнети со храна базирана на јаглехидрати. Иако можете да имате вкус на неколку, внимавањето на порциите може да ви помогне подобро да управувате со вашата гликоза во крвта. Но, имајте на ум дека дури и во мали порции, работите може да се насоберат ако изберете и мешате храна богата со голема количина на јаглехидрати. Запомнете, за да ја одржите гликозата во крвта во нормални граници, треба да го задржите вкупниот внес на јаглехидрати сличен на оној при еден ваш редовен ден.
6. Не заборавајте на вашиот зеленчук
За време на празниците изборот на зеленчук има тенденција да биде ограничен. Сепак, со додавање на само неколку едноставни јадења кои содржат зеленчук може да се додадат убави бои (и нутритивни материи) на трпезата.
Понудете се да донесете зелена салата или печен зеленчук зачинет со вкусни билки или зачини. Ако се одлучите да донесете јадење со зеленчук, одлучете се за зеленчуци што не содржат скроб (како карфиол, брокула или спанаќ) кои се со малку јаглехидрати и калории. Ова ќе ви помогне да се заситите и да го намалите внесот од остатокот од храната која веројатно ќе биде висококалорична, богата со јаглехидрати и со висока содржина на масти.
Ви посакувамe вам и на вашето семејство среќна и здрава сезона на празници!
